Sevastopol şəhərində “Birgə qalib gəldik” XIV beynəlxalq sənədli filmlər və televiziya proqramları festivalının açılışı olub. Festivalın münsiflər heyətinə Azərbaycan kinorejissoru, Avropa Kino Akademiyasının üzvü Vaqif Mustafayev rəhbərlik edir.
Tədbirə 33 ölkədən 500-dən çox ekran əsəri təqdim olunub. Festivalın prezidenti, RSFSR Xalq Artisti, “Oskar” mükafatı laureatı Vladimir Menşov açılış mərasimində bildirib ki, təşkilatçılar tərəfindən müsabiqə proqramları üçün 83 film seçilib. ABŞ, Böyük Britaniya, Fransa, Almaniya, İsveç, Çin, Macarıstan və digər ölkələrdən olan rejissorlar Sevastopolda öz yaradıcılıq işlərini təqdim edəcəklər.
Beynəlxalq sənədli film müsabiqəsinin münsiflər heyətinə rejissorlar Qunilla Breski (İsveç), Natalya Ququyeva (Rusiya), Arko Okk (Estoniya, Tallin Kino Universitetinin rəhbəri), habelə Sun Yaou (ÇXR-in Xarbin televiziya və radio yayımı bürosunun direktoru) və İnna Demejko (“Rusiya” sənədli film festivalı proqramlarının direktoru) daxildirlər.
azertag.az