Milli Dənizkənarı Park İdarəsi bu ayın sonuna qədər parkda istismara verilməsi nəzərdə tutulan yeni panorama attraksionunun – “şeytan çarxı”nın istifadəsi üçün biletlərin qiymətlərini elan edib.
İdarənin rəhbəri Nazim Məcidovun Gün.Az-a bildirdiyinə görə, biletlərin qiyməti 5 manatdan artıq olmayacaq.
Onun sözlərinə görə, çarxın bir dövretmə müddəti 30-40 dəqiqə davam edəcək. Attraksiona minmək istəyən uşaqlar 12 yaşından böyük olmalıdırlar, 5-12 yaşlılar isə çarxa yalnız valideynləri ilə buraxılacaqlar.
60 metr yüksəklikdə yerləşən və ətraf ərazinin mənzərəsini nəzərdən keçirməyə imkan verən yeni çarx “yeni bulvar” ın ərazisindədir (Əl oyunları sarayından Dövlət Bayrağı meydanına qədər ).
Attraksion 20-25 dekabr tarixində istismara veriləcək.
Çarx hal-hazırda işlək vəziyyətdədir, indi attraksiona yaxın ərazilərin abadlaşdırılması – yaşıllaşdırma, işıqlandırma və digər işlər aparılır.
Gün.Az