Bu ilin yay aylarından etibarən Azərbaycana gələn xarici ölkə
vətəndaşlarına vizalar elektron şəkildə verilə bilər. Bu barədə
mədəniyyət və turizm naziri Əbülfəs Qarayev bildirib.
Onun sözlərinə görə, dövlət başçısının müvafiq fərmanına uyğun olaraq
“Eurovision” mahnı müsabiqəsində iştirak etmək üçün Azərbaycan
paytaxtına gələn qonaqlar vizaları hava limanında ala biləcəklər:
“Vizanın elektron qaydada verilməsi üçün müvafiq proqram hazırlanır.
Burada vizanın verilməsi 15 gün ərzində nəzərdə tutulur. Getdikcə bu
müddət azaldıla bilər”.
Nazir qeyd edib ki, “Eurovision”a gələn qonaqlar hava limanında viza
almaqdan razı qalsalar, nazirlik proqram yazılanadək vizaların verilmə
qaydasının məhz bu cür həyata keçirilməsi təşəbbüsü ilə çıxış edəcək:
“Düşünürəm ki, artıq yay aylarında proqram hazır olacaq və Azərbaycana
gələn xarici vətəndaşlar vizanı elektron şəkildə ala biləcəklər”.
Ə.Qarayev Azərbaycanın digər ölkələrin proqramlarından istifadə
etməsinin mümkün olmadığını da vurğulayıb: “Çünki təhlükəsizlik
məqsədilə hər ölkənin özünün ayrıca proqramı var”.