“Türk Dünyası İnfo” İctimai Birliyinin (TDİİB) Azərbaycan
Respublikasının Prezidenti yanında Qeyri-Hökumət Təşkilatlarına Dövlət
Dəstəyi Şurasının maliyyə dəstəyi ilə icra etdiyi “Heydər Əliyev irsi və
türk dünyasının birliyi ideyası mövzusunda yeni araşdırmalar” layihəsi
başa çatmışdır. Bu münasibətlə iyulun 25-də Azərbaycanda Atatürk
Mərkəzində “Türk birliyi: dünən, bu gün, sabah” mövzusunda konfrans
keçirilmişdir. Tədbirdə mərkəzin müdir müavini Osman Musayev layihədən
danışaraq bildirmişdir ki, dörd ayda həyata keçirilən layihənin yekunu
olaraq “Türk dünyasının birliyi ideyası və Heydər Əliyev” kitabı nəşr
edilmişdir.
TDİİB-nin sədri, layihə rəhbəri Dəyanət Osmanlı iştirakçılara kitab
haqqında məlumat vermişdir. O demişdir ki, kitabda türk dünyasının böyük
dövlət və siyasi xadimi Heydər Əliyevin həyat və fəaliyyəti əsasında
türk birliyi istiqamətində görülmüş işlərə nəzər salınmış, araşdırma və
ümumiləşdirmələr aparılmışdır. Eyni zamanda, türk birliyi siyasətinin
Prezident İlham Əliyev tərəfindən uğurla davam etdirilməsi də əks
olunmuşdur. Müxtəlif məqalələrdən ibarət olan nəşrin elmi redaktoru
Milli Məclisin mədəniyyət komitəsinin sədri, AMEA-nın müxbir üzvü,
professor Nizami Cəfərovdur. Konfransda türk mədəni birliyi ilə bağlı
fikir mübadiləsi aparılmış, gələcək fəaliyyət istiqamətləri
müəyyənləşdirilmişdir.