Heydər Əliyev Mərkəzində YARAT Müasir İncəsənət Məkanının dəstəyilə
"Love Me, Love Me Not" sərgisinin açılış mərasimi keçirilib. Açılış
mərasimində Arzu Əliyeva, YARAT Müasir İncəsənət Məkanının rəhbəri Aida
Mahmudova, eləcə də digər tanınmış ictimai-siyasi xadimlər və incəsənət
təmsilçiləri iştirak ediblər. Mərasimi açan Aida Mahmudova ekspozisiya
haqqında məlumat verərək, burada Azərbaycan, İran, Rusiya və Gürcüstanı
təmsil edən 16 rəssamın əsərləri nümayiş olunacağını bildirib.
Bu sırada Rəşad Ələkbərov, Faiq Əhməd, Fərid Rəsulov, Sitarə İbrahimova,
Şoca Azəri, Əli Bənisədr, Əli Həsənov, Orxan Hüseynov, Taus Maxaçeva,
Fərhad Moşiri, "Slavyanlar və Tatarlar" rəssamlar qrupu və digərləri
var.
Daha sonra sərginin kuratoru Dina Naseri-Xadivi qonaqları salamlayıb. O
bildirib ki, burada videoçarxlar, instalyasiyalar, rəngkarlıq əsərləri
də daxil olmaqla, müxtəlif materiallardan hazırlanmış işlər təqdim
olunacaq.
"Nümayiş olunan hər bir əsər tamaşaçılara pavilyonda təqdim olunan
ölkələrin sənətinə yeni baxış nöqtəsi bəxş edir və əhatə olunan mövzular
barədə daha dərin biliklərlə paylaşmağa çalışır. Ayrıca bir sərgidə bu
cür rəssamların ərsəyə gətirdiyi işlərin nümayişi son nəticədə bizim
hamımızın tarixi və coğrafiyanı nə dərəcədə düzgün qavradığımızı
sorğu-sual edir" -deyə, Dina Naseri-Xadivi bildirib.
"Love Me, Love Me Not" sərgisi mayın 25-dək davam edəcək.
ANS PRESS