İyunun 19-dan “Park Cinema” kinoteatrlar şəbəkəsində “Planet Parni iz Baku” Şən və Hazırcavablar Klubu Teatrının “Analoqu olmayan” yeni solo konsertinin nümayişinə başlanacaqdır.
“Park Cinema” kinoteatrlar şəbəkəsindən bildirmişlər ki, “Analoqu olmayan” yeni solo konsert tamaşaçıların arzusu ilə nümayiş etdiriləcəkdir.
Bu artıq “Park Cinema” və “Planet Parni iz Baku” Şən və Hazırcavablar Klubu Teatrının birgə gerçəkləşdirdikləri üçüncü layihədir.
Qeyd edilmişdir ki, aktyorlar öz əməklərinin bəhrəsini daha böyük auditoriyaya nümayiş etdirmək baxımından “Park Cinema” kinoteatrlar şəbəkəsində yeni solo konsertin nümayişi böyük əhəmiyyət kəsb edəcəkdir.
”Planet Parni iz Baku” Şən və Hazırcavablar Klubu Teatrının sevimli qəhrəmanlarının yüksək keyfiyyətli video və səsin müşayiəti ilə təqdim olunan çıxışlarının videoyazısı xüsusi formatda hazırlanmışdır.
Tahir İmanov, Bəhram Bağırzadə, Cabir İmanov və digər aktyorların ifasında təqdim olunan maraqlı zarafatlar və yumorla bol yeni solo konsert tamaşaçılara gülüş dolu saatlar vəd edir.
AzərTAc