Əmək
və Əhalinin Sosial Müdafiəsi Nazirliyi (ƏƏSMN) tərəfindən sosial
xidmətlər sisteminin maddi-texniki bazasının gücləndirilməsi üçün sosial
reabilitasiya əhəmiyyətli yeni obyektlərin yaradılması istiqamətində
müvafiq işlər aparılır.
ƏƏSMN-in mətbuat xidmətindən verilən məlumata görə, hazırda nazirliyin
sifarişi ilə Bakının Sabunçu rayonunun Zabrat qəsəbəsində Yetkinlik
yaşına çatmayanlar üçün İxtisaslaşmış Reabilitasiya Mərkəzi və Sosial
Sığınacaq, Gözdən Əlillər üçün Tədris-Bərpa Mərkəzi, Qobustan rayonunda
isə Penitensiar müəssisələrdə cəza çəkməkdən azad olunmuş şəxslər üçün
Sosial Adaptasiya Mərkəzi inşa olunur. Həmin yeni sosial obyektlərin
cari il ərzində istifadəyə verilməsi planlaşdırılır.
“ƏƏSMN ölkənin ayrı-ayrı regionlarında da
belə obyektlərin yaradılmasını nəzərdə tutur. Belə ki, nazirlik
tərəfindən Gəncə, Ağcabədi, Quba, Masallı, Şəki, Tovuz, İsmayıllı və
Salyan rayonlarında da Yetkinlik yaşına çatmayanlar üçün hər biri 30
yerlik İxtisaslaşmış Reabilitasiya Mərkəzlərinin və 25 yerlik Sosial
Sığınacaqların tikilməsi ilə bağlı layihə-smeta sənədləri hazırlanaraq
müvafiq ekspertizadan keçib. Növbəti ilin dövlət investisiya proqramı
layihəsi ilə bağlı hazırlanan təkliflər sırasında həmin obyektlərin
inşası da yer alacaq”, - məlumatda deyilib.