Əmlak Məsələləri Dövlət Komitəsi Azərbaycanda ilk dəfə olaraq daşınmaz
əmlakın qeydiyyatı sahəsində elektron xidmətlərin tətbiqinə başlayıb.
Komitədən
verilən məlumata görə, Azərbaycanda daşınmaz əmlakın qeydiyyatı ilə
bağlı elektron xidmətlər iki mərhələdə tətbiq ediləcək ki, bunun da 1-ci
mərhələsinə artıq mart ayının 1-dən başlanıb. Mayın 1-dən isə elektron
xidmətlərin ikinci mərhələsi başlanacaq.
Bu xidmətlərin tətbiqi
nəticəsində Daşınmaz Əmlakın Dövlət Reyestrindən çıxarışların və
məhdudiyyət (yüklülük) arayışlarının alınması üçün vətəndaşlardan
müraciətlərin və bunun üçün tələb olunan sənədlərin elektron qaydada
qəbulu nəzərdə tutulur. Bununla əlaqədar olaraq sabah Əmlak Məsələləri
Dövlət Komitəsi tərəfindən Dünya Bankının dəstəyi ilə həyata keçirilən
Daşınmaz Əmlakın Qeydiyyatı Layihəsi çərçivəsində yaradılacaq Elektron
Qeydiyyat İnformasiya Sisteminin təqdimatı keçiriləcək.
Təqdimat
mərasimində məqsəd müvafiq dövlət qurumları, qeyri-hökumət təşkilatları,
hüquqi və fiziki şəxslərə Elektron Qeydiyyat İnformasiya Sisteminin
mahiyyəti, iş prinsipi və ondan istifadə imkanları barədə məlumat
vermək, bu sahədə müvafiq izahat işləri aparmaqdır.
APA