İyulun 19-da Yaponiya Mədəniyyət Günləri çərçivəsində bu ölkənin
Azərbaycandakı səfiri Şusuke Vatanabe “İrəli” Gənclik Mərkəzində
olmuşdur. Qonaq əvvəlcə mərkəzlə tanış olmuş, gənclərin iş fəaliyyəti
ilə maraqlanmışdır. Sonra dəyirmi masa ətrafında davam edən görüşdə
“İrəli” İctimai Birliyinin sədri, Milli Məclisin deputatı Ceyhun Osmanlı
səfirə rəhbərlik etdiyi təşkilatın yaranması, əhatə dairəsi və həyata
keçirdiyi layihələr haqqında məlumat vermişdir. O, Yaponiya səfirliyi
ilə qısa müddətdə yaranan əlaqələrdən söhbət açmış və bunu Ş.Vatanabenin
gənclərə diqqəti ilə izah etmişdir. Tədbirdə çıxış edən səfir
Ş.Vatanabe xalqlar arasında dərin dostluq münasibətlərindən, Azərbaycan
və yapon mədəniyyəti arasındakı oxşar cəhətlərdən, ölkələrimizin mədəni
əməkdaşlığının uğurlu inkişafından və bütün sahələrdə əlaqələrin
gündən-günə genişlənməsindən danışmışdır. Ölkəmizin təbii sərvətləri və
insanları ilə zəngin olduğunu deyən səfir Azərbaycan gənclərinin
gələcəyinə böyük ümidlər bəslədiyini bildirmişdir. Demişdir ki, bu qədər
gəncin yapon dilinə və mədəniyyətinə marağı onda təəccüb doğurur. Ona
görə də arzu edirəm ki, bu gənclər Yaponiyanı öz gözləri ilə görsünlər.
Səfir Ş.Vatanabe ölkəsində baş verən zəlzələdən sonra yapon xalqının
dərdinə şərik olmaq üçün səfirliyə gələn qaçqın uşaqların onu
kövrəltdiyini bir daha diqqətə çatdırmışdır.
Səfir gənclərin yapon mədəniyyəti, adət-ənənəsi və musiqisi ilə bağlı suallarını cavablandırmışdır.
Görüşdə yapon gənclərinin həyat tərzi, düşüncə və davranışlarından bəhs edən film göstərilmişdir.