“Bakı 2015 Avropa Oyunları” simvol olaraq ceyran və narı seçdi.
“Bakı 2015”in Əməliyyat Komitəsi simvolların Azərbaycanın təbiətindən və irsindən ruhlanaraq götürüldüyünü açıqlayıb.
Bildirilib ki, ceyran və nar ölkənin qürurlu tarixini və ümidverici gələcəyini əks etdirir. Bu cütlük “Bakı 2015”in təbliğatında brend rolunda çıxış edərək bütün dünyada birinci Avropa Oyunlarının simvoluna çevriləcək.
Ceyran qonaqlara Azərbaycanın zəngin irsinə nəzər salmağı təklif etməklə Oyunların mədəniyyət elçisi olacaq. Qafqaz dağlarından tutmuş Xəzər dənizinin sahillərinədək Ceyran qonaqlara ölkə boyu bələdçilik edəcək və onlara Azərbaycanın gözəlliklərini nümayiş etdirəcək.
Qeyd edək ki, ceyran ölkədə təbii gözəlliyin, zərifliyin və saflığın simvolu və Azərbaycanda qorunan heyvan növlərindən biridir. Nar isə günəşi sevən meyvədir və Azərbaycan folklorunda birliyi tərənnüm edir.
Məlumata görə, simvollar illüstrasiya olaraq formalaşdırıblar, amma tezliklə animasiyalı və real görünüşə sahib olaraq Avropa Oyunları merçendayzinqinin bir hissəsi olacaqlar.
Gün.Az