Sentyabrın 3-də Rusiyanın Çelyabinsk şəhərində vilayət diyarşünaslıq
muzeyinin sərgi salonunda “İpək dostluq yolu. Yeddi gün Azərbaycanda”
fotosərgisi açılacaqdır. Fotosərgi Azərbaycan Respublikasının dövlət
müstəqilliyinin bərpa edilməsinin 20 illiyinə və Cənubi Ural paytaxtının
275 illiyinə həsr olunacaqdır.
Sərgidə nümayiş etdiriləcək işlərin müəllifi Çelyabinskin məşhur foto
sənətkarı, Rusiya Foto Sənətkarları İttifaqının Çelyabinsk regional
şöbəsinin sədri, diyarşünaslıq muzeyinin direktoru Vladimir
Boqdanovskidir.
Ekspozisiyaya müxtəlif janrlarda – peyzaj, portret, rəsm, reportaj
janrlarında hazırlanmış təqribən 90 fotoşəkil təqdim olunmuşdur.
Fotokolleksiyanı “Ozan” Azərbaycan Mədəniyyət Mərkəzi tərəfindən təqdim
olunmuş eksponatlar - əlvan milli geyimlər, məişət əşyaları, dekorativ
tətbiqi sənət əsərləri, məşhur Azərbaycan ipəkləri və xalçaları
tamamlayacaqdır. Sərginin videoproqramında Azərbaycanın tarixindən və
mədəniyyətindən bəhs edən bir neçə film vardır.
“İpək dostluq yolu” sərgi layihəsi Çelyabinsk vilayətinin mədəniyyət və
turizm naziri Aleksey Betextinlə Bakı şəhərinin Mədəniyyət və Turizm
İdarəsinin rəisi Əlikram Əliyev tərəfindən imzalanmış hökümətlərarası
saziş çərçivəsində həyata keçirilir. 2010-cu ilin noyabrında “Çelyabinsk
vilayəti və Azərbaycanın xalqlar dostluğu ongünlüyü” zamanı
Azərbaycanın nümayəndə heyəti Çelyabinskdə olmuşdu. 2011-ci ilin
iyulunda isə diyarşünaslıq muzeyinin direktoru Vladimir Boqdanovski və
Çelyabinsk vilayətindəki “Ozan” Azərbaycan Mədəniyyət Mərkəzi ictimai
təşkilatının sədri Rəfail Quliyev Bakıya çəkilişə gəlmişdilər. Yeddi gün
davam edən gərgin iş nəticəsində yaranmış “Yeddi gün Azərbaycanda”
sərgisini indi Çelyabinskdə səbirsizliklə gözləyirlər.
Sərgi “Şəhər günü”ndə açılacaqdır.