Avqustun 28-də Diasporla İş üzrə Dövlət Komitəsinin təşkilatçılığı ilə
Gürcüstanın Batumi şəhərində “Azərbaycan dövlət müstəqilliyinin
bərpasının 20-ci ilində” mövzusunda konfrans keçirilmişdir.
Azərbaycanın və Gürcüstanın dövlət və hökumət rəsmilərinin,
parlamentlərin deputatlarının, qeyri-hökumət təşkilatlarının
nümayəndələrinin iştirak etdikləri konfransı Diasporla İş üzrə Dövlət
Komitəsinin sədri Nazim İbrahimov açaraq tədbirin əhəmiyyətindən
danışmışdır.
Nazim İbrahimov demişdir ki, bu konfrans Prezident İlham Əliyevin
“Azərbaycan Respublikasının dövlət müstəqilliyinin bərpasının iyirminci
ildönümü haqqında” Sərəncamı ilə təsdiq edilmiş Tədbirlər Planına uyğun
olaraq keçirilir.
Konfransın Azərbaycanın dövlət müstəqilliyinin bərpasından sonrakı
iyirmi il ərzində görülmüş işlərə, əldə olunmuş nailiyyətlərə, o
cümlədən Azərbaycan-Gürcüstan münasibətlərinin müxtəlif aspektlərinə
dair məruzələri dinləməyə, Gürcüstan azərbaycanlılarının cəmiyyətə
inteqrasiyası sahəsində görülmüş işlərə nəzər salmağa imkan verəcəyini
qeyd edən Nazim İbrahimov bu müzakirələrin ölkələrimiz arasındakı
strateji tərəfdaşlığın möhkəm təməllərə əsaslandığını bir daha təsdiq
edəcəyinə əminliyini söyləmişdir.
Azərbaycanın və Gürcüstanın dövlət himnləri səsləndikdən sonra tədbir
“Müstəqilliyimiz əbədidir” sənədli filminin nümayişi ilə davam etmişdir.
Gürcüstanın diaspor məsələləri üzrə dövlət naziri M.Davitaya demişdir
ki, onun ölkəsi hər zaman Azərbaycanın inkişafını böyük maraqla müşahidə
edir. Azərbaycan ilə Gürcüstanın tarixləri hər zaman bir-birinə bağlı
olmuşdur və bu, indi də davam edir.
Kvemo Kartli-Borçalı bölgəsinin qubernatoru David Kirkitadze çıxışına
Dünya azərbaycanlılarının III qurultayının əhəmiyyətini xatırlatmaqla
başlamışdır. O demişdir ki, həmin qurultay Azərbaycanın sürətli
inkişafının nümayişi idi. Bugünkü konfransı da həmin qurultayın davamı
hesab etmək olar.
Azərbaycan Prezidenti Administrasiyasının ictimai-siyasi məsələlər
şöbəsinin müdiri, professor Əli Həsənov konfransda “Azərbaycan
Respublikasının Cənubi Qafqazın iqtisadi və siyasi inkişafında rolu”
mövzusunda məruzə ilə çıxış etmişdir.
Daha sonra konfransda Milli Məclisin deputatları Qənirə Paşayeva, Musa
Qasımov, ombudsman Elmira Süleymanova, Mədəniyyət və Turizm Nazirliyinin
şöbə müdirinin müavini Mahir Qəhrəmanov, İqtisadi İnkişaf Nazirliyinin
sektor müdiri Rəşad Dayıyev çıxış etmişlər.
Konfrans öz işini avqustun 29-da “Gürcüstan azərbaycanlılarının yerli
cəmiyyətə inteqrasiyası Azərbaycan-Gürcüstan strateji tərəfdaşlığı
kontekstində” mövzusunda “dəyirmi masa” ilə davam etdirmişdir.