Beynəlxalq Futbol Tarixi və Statistikaları Federasiyası (İFFHS) 2014-cü ilin ən yaxşı hakimlərinin adlarını açıqlayıb.
Qurumun dünyanın bütün ölkələrində olan nümayəndələri arasında keçirdiyi sorğunun nəticələrinə əsasən ötən ilin ən yaxşısı Nikola Rizzoli olub.
İtaliyalı FİFA referisi səsvermədə 131 xal toplayıb. İngiltərəli Hovard Uebb isə 78 xalla 2-ci olub. Maraqlıdır ki, 2013-cü ildə də İFFHS-in səsverməsində də ilk iki yeri bu hakimlər tutmuşdu. Lakin 1 il öncə ingiltərəli birinci, italiyalı 2-ci olmuşdu.
Rizzolinin ən yaxşı olmasında Braziliyada keçirilən dünya çempionatının final oyununun məhz ona həvalə edilməsi də böyük tol oynayıb. Belə ki, Rizzoli Almaniya ilə Argentina arasında qarşılaşmada fit çalmışdı. Həmin oyunda Almaniya 1:0 hesabı ilə qalib gəlib.
61 xal toplayan almaniyalı Feliks Brix isə dünyanın 3-cü ən yaxşı hakimi olub. Hollandiyalı Byorn Kuypers (45 xal) 4-cü, özbəkistanlı Ravşan İrmatov (37 xal) 5-ci, portuqaliyalı Pedro Proensa (34 xal) 6-cı olub.
İlk “onluq”da yer alan ispaniyalı Karlos Velasko Karvalyo 16, türkiyəli Cüneyt Çakır və meksikalı Marko Antonio Rodriges Moreno hərəyə 13, argentinalı Nestor Fabian Pitana isə 7 xal toplayıb.
Gün.Az