Fevralın 12-dən etibarən Nizami Kino Mərkəzində 3D formatında “Süngər Bob” animasiya filminin, “Kinqsman: məxfi xidmət” və “Bozun 50 çaları” bədii filmlərinin nümayişi başlanıb.
Amerika rejissoru Pol Tibbitin çəkdiyi “Süngər Bob” cizgi filmi ailəvi komediya və macəra janrındadır. Filmin yaş həddi: +6.
Süjet xəttinə gəlincə, hamının sevimlisi olan Süngər Bob öz sualtı dünyasını xilas etmək üçün dostları ilə Yerüstü dünyaya çıxmalıdır.
Sözügedən ekran əsərində rolları Antonio Banderas, Tom Kenni, Erik Bauza, Tim Konuey, Eddi Dizen, Rob Polsen, Kevin Maykl Riçardson, Eypril Styuart, Kri Sammer, Billi Uest və başqa aktyorlar canlandırıb.
Rejissor Metyu Vonun Ceyn Qoldmanın ssenarisi əsasında çəkdiyi “Kinqsman: məxvi xidmət” filmi komediya, məcəra, kriminal və döyüş janrındadır. Yaş həddi: 18+
Filmin əsas qəhrəmanı - dəniz piyada qoşun xidməti çəkmiş Ceri yüksək intellektə sahibdir. Böyük işlərə nail ola biləcək halda xırda cinayətkar olmağı seçən gənc, günlərin birində vaxtilə atasının xilas etdiyi Qarri Hartla tanış olur. Həmin insan Cerinin həyatını yaxşıya doğru dəyişmək üçün əlindən gələni etməyə çalışır. Harri ona, dünyanın müdafiəsində dayanmış məxfi müstəqil təşkilatın agenti olduğunu söyləyir və xüsusi təlim keçdikdən sonra bu komandaya üzv olmağı təklif edir. Amma təklifi qəbul edən Ceri bütün sınaqlardan keçib Harrinin ümidlərini doğrulda biləcəkmi?
Filmdəki rolları Kolin Fert, Semuel L.Cekson, Maykl Keyn, Adrian Kuinton, Mark Stronq, Conno Devis, Cek Devenport, Aleks Nikolov, Samanta Yanu, Mark Hemmil və digər aktyorlar ifa ediblər.
Yeni filmlər sırasında ilin ən gözlənilən “Bozun 50 çaları” filmini rejissor Sem Teylor –Conson, E.L.Ceymsin eyniadlı roman-bestselleri əsasında çəkib. Ekran əsəri dram və melodram janrlarının remiksidir. Yaş həddi: 18+++
Filmdə, Anasteyşa rolunu ifa edən Hollivud ulduzları Melani Qriffit və Don Consonun qızı – Dakota Conson bu ekran əsərini möcüzəvi məhəbbət nağılı adlandırıb.
Baş qəhrəman Anasteyşa Stil yaxın rəfiqəsi və qrup yoldaşı Keytlə birgə kirayə evdə qalırlar. Universitetdə buraxılış imtahanına bir həftə qalmış Anasteyşa xəstələnən rəfiqəsinin xahişi ilə cazibədar milyarder Kristian Qreydən müsahibə almağa gedir. Çox da uğurlu alınmayan müsahibədən sonra Anasteyşa cavan milyarderlə bir daha görüşəcəklərini ağlına belə gətirmir. Gözlənilmədən Qrey gənc qızın işlədiyi mağazada peyda olur və bu gəliş onların tanışlıqlarına davam verir. Müddət keçdikcə Anasteyşa varlı Qreyin gizli seksual hissləri haqda öyrənir...
Filmdəki obrazları aktyorlar Ceymi Dornan, Dakota Conson, Lyuk Qrayms, Viktor Rasuk, Eloiza Mamford, Marşa Qey Harden, Rita Ora, Maks Martini, Kallum Kit Renni, Cennifer İli və başqaları canlandırıb.
Filmlər haqqında daha ətraflı məlumatı Nizami Kino Mərkəzinin Facebook səhifəsindən öyrənə bilərsiniz. https://www.facebook.com/NizamiCinema?rf=hl
Gün.Az