“Bu günə kimi bu cür ölkəni tanımamağımdan dolayı çox utanıram. Burada olmaq və bu gözəl ölkəni tanımaq mənim üçün böyük şansdır. Sizin çox gözəl ölkəniz var, Bakı isə məni heyran etdi, bu, möcüzələr şəhəridir”. Bu sözləri məşhur xorvat aktrisası, Hollivud aktyoru Riçard Girlə “Xantın ovu” filmində rol alan Kristina Krepela deyib.
Yazıçı Elçinin “Mahmud və Məryəm” filmində Ceylan roluna dəvət alan aktrisa, məhz bu filmdə oynamaq üçün Bakıya gəlib və heyətlə birgə bu gün Şəkiyə yola düşüb. Aktrisa bildirib ki, Azərbaycanda keçirilən “Eurovision-2012” yarışmasından sonra bütün Avropa tez-tez Bakıdan danışır: “Mən bura gəlməmişdən əvvəl “Eurovision” təmsilçimiz Nina Badriçdən Bakı haqqında bütün məlumatları istədim. Nina sizin şəhərə elə vurulub ki, hər yerdə və hamıya Bakı haqqında danışır. Amma o məni aldatdı. Nina mənə Bakının küləklər şəhəri adlandırıldığını dedi, amma bura çox istidir”. Aktrisa onu da deyib ki, “Mahmud və Məryəm” filmində türk dilində danışmaq ona çətin olacaq, amma o, yaradıcı heyətin dəstəyinə inanır.
APA