Abşeron rayon Qobu qəsəbə 2 nömrəli tam orta məktəbi 80 yaşını qeyd edib.
Yubiley tədbiri dövlət himninin səsləndirilməsi ilə başlayıb.
Əvvəlcə məktəbin direktoru Lətifə Əmraslanova qonaqları salamlayaraq tədris ocağının tarixindən söz açıb. Bildirilib ki, Qobu qəsəbə 2 nömrəli tam orta məktəb 1936-cı ildə fəaliyyətə başlayıb. Məktəbdə hazırda 602 şagirdin təlim-tərbiyəsi ilə 43 müəllim məşğul olur. Orta təhsil ocağının şagirdləri regionda və paytaxtda təşkil olunan müsabiqə və olimpiadalarda yüksək nailiyyətlər qazanıblar. Belə ki, məktəbin məzunları “Tərəqqi” medalı, “Əməkdar Müəllim”, “Əməkdar Həkim”, “Əməkdar Mühəndis” fəxri adları ilə təltif olunublar. Ötən tədris ilində 12 nəfər, bu il isə 9 şagird yüksək nəticə ilə ali məktəbə qəbul olaraq məzun adı qazanıb.
Abşeron Rayon İcra Hakimiyyəti başçısının müavini Fuad Cəbrayılov tədris ocağının 80 ilik yubileyi münasibətilə məktəb kollektivini və iştirakçıları təbrik edib. O, Qobu 2 nömrəli tam orta məktəbdə, eləcə də Abşeron rayonunda təhsilin inkişafı istiqamətində əldə olunan uğurlardan, həyata keçirilən layihələrdən geniş bəhs edib və hazırda respublikamızda şagirdlərin təhsil almaları üçün dövlət tərəfindən hər bir şəraitin yaradıldığını bildirib.
Məktəbin 80 illik yubileyi münasibətilə rayon icra hakimiyyəti adından xatirə hədiyyəsi təqdim olunub.
Tədbirdə rayon təhsil şöbəsinin müdiri Kamran Rzayev, rayon Ağsaqqallar Şurasının sədri Nadir Ağayev, Əməkdar Müəllim Təyyübə Hüseynova və digərləri məktəbin kollektivini yubiley münasibətilə təbrik ediblər.
Yubiley tədbiri konsert proqramı ilə davam edib.
azertag.az