Azərbaycan Rəssamlar İttifaqının, Beynəlxalq Rəssamlar Konfederasiyasının üzvü, Rusiya Rəssamlıq Akademiyasının fəxri akademiki Abbas Kazımov “Rənglərin qafiyəsi” layihəsinə görə Rusiya Rəssamlıq Akademiyasının qızıl medalı ilə təltif edilib. Medal rəssama Rusiya Rəssamlıq Akademiyasının rəyasət heyətinin iclasında təqdim olunub. Təqdimetmə mərasimində Azərbaycanın Rusiyadakı səfirliyinin humanitar məsələlər üzrə müşaviri Vüqar İmaməliyev iştirak edib.
“Rənglərin qafiyəsi” layihəsi bu ilin iyununda Azərbaycanın RF-dəki səfirliyinin və Heydər Əliyev Fondunun Rusiya nümayəndəliyinin dəstəyi ilə təqdim olunub. Ekspozisiyaya müəllifin “Qırmızı və Qara”, “Pirosmaniyə ithaf” və “Xalça üslubunda” seriyasından 100-dək əsəri daxil edilib.
Abşeron rəngkarlıq məktəbinin ən məşhur yetirmələrindən biri olan Abbas Kazımovun əsərləri Rusiya Dövlət Şərq Muzeyində, Dövlət Tretyakov Qalereyasında, habelə Azərbaycan, Rusiya və digər ölkələrin muzeylərində, rəsm qalereyalarında və şəxsi kolleksiyalarda nümayiş etdirilir.
azertag.az