31 Dekabr - Dünya Azərbaycanlılarının Həmrəylik Günü və Yeni ilin gəlişi Abşeron rayonunda böyük ruh yüksəkliyi ilə qeyd edilib.
Xırdalan şəhərindəki Heydər Əliyev Mərkəzində təşkil olunan bayram tədbirində rayon icra hakimiyyətinin başçısı İradə Gülməmmədova abşeronluları təbrik edərək, Dünya Azərbaycanlılarının Həmrəylik Gününün yaranma tarixindən və əhəmiyyətindən danışıb. O, respublika iqtisadiyyatının inkişafının möhkəm təməlini qoyan ümummilli lider Heydər Əliyevin xidmətlərini vurğulayaraq, Prezident İlham Əliyevin uğurlu fəaliyyəti nəticəsində Azərbaycanda bütün sahələrdə davamlı tərəqqinin təmin edildiyini bildirib.
Rayon icra hakimiyyətinin başçısı 2016-cı ilin Abşeron rayonu üçün də uğurlu olduğunu diqqətə çatdırıb. Qeyd edilib ki, yola saldığımız ildə rayonda infrastrukturun yenilənməsi, sakinlərin həyat şəraitinin yaxşılaşdırılması üçün bir sıra layihələr həyata keçirilib, abadlıq işləri görülüb.
Bayram tədbiri respublikanın tanınmış incəsənət ustalarının ifasında geniş konsert proqramı ilə davam edib. Konsert proqramı tamaşaçılar tərəfindən alqışlarla qarşılanıb.
Xırdalan şəhərindəki Heydər Əliyev adına parkda təşkil olunan bayram atəşfəşanlığını sakinlər maraqla seyr ediblər.
azertag.az