Naxçıvan Dövlət Uşaq Teatrında özfəaliyyət dram dərnəklərinin muxtar respublika baxış müsabiqəsinin birinci mərhələsi olub.
Müsabiqədə muxtar respublikada fəaliyyət göstərən özfəaliyyət dram dərnəkləri, eləcə də ali və orta ixtisas təhsil müəssisələrində fəaliyyət göstərən özfəaliyyət teatr kollektivləri iştirak ediblər.
Teatr tamaşaları səhnəciklərinin, bədii filmlərdən fraqmentlərin, sərbəst şəkildə yazılan etüd və hazır əsərlərin təqdim olunduğu müsabiqə maraqlı çıxışlarla yadda qalıb. Münsiflər heyəti kollektivlərin ifaları, ssenarilərin bədiiliyi və müasirliyi, ifa tərzi və səhnə mədəniyyətinə görə qiymətləndirmə aparıblar.
Yekun nəticəyə görə, Culfa Rayon Mədəniyyət və Turizm Şöbəsi Gənclər Birliyinin, Naxçıvan Dövlət Texniki Kollecinin, Babək rayonunun Kərimbəyli kənd mədəniyyət evinin və Naxçıvan şəhər “Mozalan” özfəaliyyət dram dərnəklərinin kollektivləri ikinci mərhələdə iştirak etmək hüququ qazanıblar.
Qeyd edək ki, müsabiqənin ikinci mərhələsinin keçirilməsi bu il aprel ayının 28-nə nəzərdə tutulub və bu mərhələdə kollektivlərin ifa edəcəyi səhnəciklərin mövzularını münsiflər heyəti təqdim edəcək.
azertag.az