Azərbaycanın Milli Qəhrəmanı Mübariz İbrahimovun həyatından bəhs edən “Mübariz” filminin tizeri yayımlanıb.
Keyfiyyətli vuruşma səhnələri ilə sosial şəbəkələrdə marağa səbəb olan tizer filmin böyük əks-səda doğuracağını deməyə əsas verir.
Tizer İstanbulda “İst Film” çəkiliş qrupu tərəfindən peşəkar kaskadyorlarla çəkilib.
Türkiyə, Hollivud, Bollivud, o cümlədən Azərbaycandan məşhur aktyorların filmdə rol alması gözlənilir. Vuruşma səhnələri üçün xüsusi olaraq dünyada tanınan rejissorlarla görüşülüb.
Film Azərbaycanda çəkiləcək. Ssenarinin əsas hissəsi hazırdır. Ətraflı olaraq ssenari çalışmaları üçün yaxın günlərdə “İst Film”in yaradıcı qrupu Bakıya gələcək.
Filmin ssenaristləri Türkiyədən Ali Doğançay, Azərbaycan Rəşad Süleymanoğludur.
Hazırlıq işləri başa çatdıqdan sonra filmin çəkilişlərinə başlanılacaq.
Ekran əsərinin 2018-ci ildə kinoteatrlarda tamaşaçıların ixtiyarına veriləcəyi planlaşdırılır.
azertag.az