Qəbizlikdən azad olmaq üçün dərhal dərmanlara əl atmayın. Əgər qəbizlik bir neçə gün ərzində davam edirsə, düzgün seçilmiş qidalar bağırsaqları yumşaldacaq və onların boşalmasını təmin edəcək.
Belə müalicəvi qidaların arasında:
- Yulaf yarması (gerkules) sıyığı. Yarmanı axşamdan isti suda isladın, səhər 1-2 dəqiqə ərzində vam odda bişirin (çox bişirmək olmaz) və yeyin. Effektliyini artırmaq üçün sıyığa kişmiş, ərik qurusu, qavalı əlavə edin. Meyvələri qabaqcadan isti suda isladın və sonra sıyığa əlavə edin.
- Arpa yarması sıyığı. Bu sıyıq da çox yaxşı effekt verir. Sıyığı çox bişirməyin, sıyıq "diri" qalmalıdır. Bu halda bağırsaqlara lazım olan effekt verəcək.
- Tərəvəz salatları (kələm, xiyar, pomidor, bibər, kök, soğan, göyərtilər). Tərəvəz salatları qidalı liflərlə zəngindir ki, bu liflər bağırsaqlarda şişir və bağırsaqların boşalmasını sürətləndirir. Salata 1 xörək qaşığı buğda kəpəyi (supermarketlərdə satılır) və bir qədər zeytun yağı əlavə etdikdə, salatın müalicəvi xüsusiyyətləri daha da artır.
- Meyvə salatları. Xüsusilə alma, kivi, ərik, qavalı kimi meyvələr yaxşıdır. Meyvələri xırda doğrayın və qarışdırın, bio-yoqurt əlavə edin.
- Qatıq + zeytun yağı. 1 stəkan otaq temperaturunda olan qatığa 1 x.q. zeytun yağı əlavə edin, qarışdırın və kiçik qurtumlarla için.
- Qarabaşaq sıyığı + qatıq. Qarabaşaq sıyığı bişirilir (çox bişirməyin, "diri" qalsın) və qatıqla qarışdırılır.
- 1 stəkan qatıq + 1 x.q. buğda kəpəyi. Qarışdırılır və ilıq halda içilir.
- Səhər tezdən acqarına otaq temperaturunda 1 stəkan su için. Dükanlarda butulkalarda satılan təmizlənmiş suya üstünlük verin. Su bağırsaqları "işə salmağa" kömək edir.
Qəbizlik zamanı ağrılar və s. xoşagəlməz simptomlar meydana çıxdıqda mütləq həkimə müraciət edin.
saglamolun.az