Mənzil İnşaatı Dövlət Agentliyinin ikinci layihəsi - Hövsan Yaşayış Kompleksində ilk mənzillərin 2019-cu ilin yay aylarında, yaşayış massivinin isə 2020-ci ildə tam təhvil verilməsi planlaşdırılır. Bu kompleks üç minə yaxın mənzildən, 1920 şagird yerlik orta məktəbdən, hər biri 260 yerlik olmaqla, iki uşaq bağçasından, xəstəxanadan və digər ictimai obyektlərdən ibarət olacaq.
Bunu ötən gün Azərbaycan prezidenti İlham Əliyevin sədrliyi ilə Nazirlər Kabinetinin 2018-ci ilin birinci rübünün sosial-iqtisadi inkişafının yekunlarına və qarşıda duran vəzifələrə həsr olunan iclasında Mənzil İnşaatı Dövlət Agentliyinin İdarə Heyətinin sədri Samir Nuriyev bildirib.
O bildirib ki, bu kompleks üç minə yaxın mənzildən, 1920 şagird yerlik orta məktəbdən, hər biri 260 yerlik olmaqla, iki uşaq bağçasından, xəstəxanadan və digər ictimai obyektlərdən ibarət olacaq. Agentliyin İdarə Heyətinin sədri burada 10 min nəfərdən çox insanın yaşamasının gözlənildiyini bildirib.
S.Nuriyev agentliyin ilk layihəsi Yasamal Yaşayış Kompleksindən də danışaraq bildirib ki, 29 çoxmənzilli yaşayış binasından ibarət olan Kompleksdə 1843 ailənin mənzillə təmin edilməsi planlaşdırılır:
“Bu da altı mindən çox insanın mənzil probleminin həll edilməsi deməkdir. Hazırda kompleksdə tikinti işləri sürətlə davam edir. Artıq 19 binada konstruksiya və hörgü işləri yekunlaşdırılıb, təmir işlərinə başlanılıb.
Cari ilin iyun ayında ilk mənzillər tam təmirli, mətbəx mebeli ilə təchiz edilmiş vəziyyətdə təhvil veriləcək. Eyni zamanda, bu şəhərcikdə 960 şagird yerlik orta təhsil məktəbi və 240 yerlik uşaq bağçası tikilməkdədir”.
Məlum olub ki, Yasamal Yaşayış Kompleksində bütün işlərin yekunlaşması 2019-cu ilə planlaşdırılır:
“Dövlət büdcəsindən asılılığı minimuma endirmək məqsədilə Yasamal Yaşayış Kompleksi layihəsi çərçivəsində üç investisiya müsabiqəsi keçirilib. Müsabiqələrdə qalib gəlmiş şirkətlərlə təşkil olunan dövlət-özəl sektor tərəfdaşlığı çərçivəsində 18 mln. manata yaxın özəl sərmayə cəlb olunub.
Bu vəsait üç yaşayış binasının inşasına, ərazidə telekommunikasiya infrastrukturunun yaradılmasına, habelə ticarət mərkəzinin tikintisinə yönəldiləcək”.
Xatırladaq ki, Hövsan Yaşayış Kompleksinin təməli 2017-ci il dekabrın 24-də, Yasamal Yaşayış Kompleksinin təməli isə 2016-cı il dekabrın 24-də qoyulub.
oxu.az