Bakı Ali Neft Məktəbində (BANM) tələbələrin ümummilli lider Heydər Əliyevin anadan olmasının 95-ci ildönümünə həsr olunmuş respublika elmi-texniki konfransının açılışı olub.
Ali Məktəbdən verilən məlumata görə, tədbirdə BANM-ın rektoru Elmar Qasımov, SOCAR-ın Kadr, rejim və informasiya texnologiyaları üzrə vitse-prezidentinin müavini Asif Şəfəqqətov, münsiflər heyətinin üzvləri kimi digər ali təhsil müəssisələrinin nümayəndələri, BANM-ın professor-müəllim heyəti və tələbələri, həmçinin respublikanın müxtəlif universitetlərinin tələbələri iştirak ediblər.
Konfransı BANM-ın rektoru Elmar Qasımov bütün iştirakçıları salamlayaraq tədbirin ənənəvi olaraq hər il Ali Məktəbdə keçirildiyini qeyd edib. Artıq 6-cı ildir ki, keçirilən tələbə elmi-texniki konfransının ulu öndər Heydər Əliyevin anadan olmasının 95-ci ildönümünə həsr olunduğunu bildirən rektor Elmar Qasımov bu tədbirin ümummilli liderin şəxsiyyətinə olan dərin hörmət və ehtiramın təzahürü olduğunu qeyd edib. Rektor bildirib ki, konfransın keçirilməsinin əsas məqsədi tələbələrin elmə olan maraqlarını, bilik və bacarıqlarını aşılamaq, onlarda elmi-tədqiqat işləri aparmaq üçün maraq yaratmaq və bu sahədə tələbələr arasında bilik və bacarıqların mübadiləsini təmin etməkdir.
Daha sonra SOCAR-ın Kadr, rejim və informasiya texnologiyaları üzrə vitse-prezidentinin müavini Asif Şəfəqqətov çıxış edərək Prezident İlham Əliyevin Azərbaycanda gənclərə göstərdiyi diqqət və qayğıdan danışıb və gənclərin elm və təhsilə cəlb olunmasını dövlətin təhsil siyasətinin əsas istiqamətlərindən biri olduğunu qeyd edib.
Konfrans plenar bölmə, “Heydər Əliyev və Azərbaycan iqtisadiyyatının inkişafı - 1969-2003-cü illər” bölməsi, “Kimya mühəndisliyi” bölməsi, “Fizika-riyaziyyat” bölməsi, “Proseslərin avtomatlaşdırılması mühəndisliyi” bölməsi olmaqla beş bölmədən ibarət olacaq. İndiyədək bu bölmələr üzrə BANM və digər universitetlərdən ümumi 68 məruzə təqdim edilib. Bu məruzələrdən 35-i BANM-a, qalanı isə digər universitetlərə aiddir.
Konfransda iştirak üçün bu il respublika üzrə 10-a yaxın ali təhsil müəssisəsi qoşulub.
Açılışda iştirak edən qonaqlar tərəfindən tədbirin işinə dair müsbət fikirlər səsləndirilib. Konfransın ilk günündə həmçinin 5 plenar məruzə təqdim olunub.
Mayın 2-dək davam edəcək tədbirdə bölmələr üzrə iclaslar keçiriləcək, yekun iclasda isə tələbələr tərəfindən hazırlanmış məruzələrin mükafatlandırılması olacaq. Mükafatlandırılma zamanı tələbələrə 1-ci və 2-ci dərəcəli diplomların təqdim olunması, eləcə də çıxışları ilə seçilmiş tələbələrə sponsorlar tərəfindən həvəsləndirici mükafatların verilməsi nəzərdə tutulub.
Qeyd edək ki, konfransa SOCAR, SOCAR AQŞ, ABB, "Avandsis Group", "Schneider Electric", "Emerson", "Total", "Statoil", "Halliburton", "Confidence Capital", BP, "TP Engineering", "Schlumberger" kimi şirkətlər dəstək göstəriblər.
report.az