Rusiya prezidenti Vladimir Putinin fərmanı ilə Azərbaycan Dövlət Rus Dram Teatrının baş rejissoru Aleksandr Şarovski mədəniyyətin və incəsənətin inkişafına verdiyi töhfəyə görə “Puşkin medalı” ilə təltif edilib.
Teatrdan verilən məlumata görə, Puşkin medalı ilə Rusiya vətəndaşları və əcnəbilər incəsənət və mədəniyyət, təhsil və ədəbiyyat sahəsində nailiyyətlərinə görə, mədəni irsin öyrənilməsində və qorunmasına böyük töhfə verənlər, millətlər və millətlərin mədəniyyətlərinin yaxınlaşmasında əməyi olanlar təltif edilir. Puşkin medalı bir qayda olaraq 20 il və ya daha çox humanitar, ictimai işlər üzrə fəaliyyət göstərənlərə təqdim edilir.
Qeyd edək ki, bu ilin fevral ayında rejissorun 65 yaşı olacaq. O, 1976-cı ildən S.Vurğun adına Rus Dram Teatrının aktyoru, 1991-ci ildən quruluşçu rejissor, 1993-cü ildən teatrın baş rejissoru vəzifələrində işləyir. Bu illər ərzində səhnədə 50-dən çox rol oynayıb, 4 kinofilmdə çəkilib, 54 tamaşa qurub. 1988-ci ildə A.Şarovski "Əməkdar artist", 1999-cu ildə "Xalq artisti" fəxri adlarına layiq görülüb. 2005-ci ildən Azərbaycan prezidentinin fərdi təqaüdçüsüdür. "Qızıl dərviş" və "Humay" mükafatları laureatıdır.
2012-ci ildə Rus Dram teatrında dövlət sifarişi ilə səhnələşdirilən “Müsyo Jordan və Dərviş Məstəli şah” tamaşası paytaxt Moskva ilə yanaşı, Sankt-Peterburqda, Yaroslavlda oynanılıb. Tamaşa həmçinin Ukrayna, Moldova və Gürcüstan teatrlarının səhnələrində də qoyulub. Azərbaycan Mədəniyyət və Turizm Nazirliyinin dəstəyi sifarişi ilə hazırlanan tamaşa görkəmli Azərbaycan mütəfəkkiri, milli dramaturgiyamızın banisi, ictimai xadim, maarifçi Mirzə Fətəli Axundovun 200 illik yubileyinə həsr olunub. Quruluşçu rejissoru Aleksandr Şarovski olan tamaşanın geyim üzrə rəssamı əməkdar incəsənət xadimi Fəxriyyə Xələfova, dekorasiya rəssamı əməkdar rəssam Tahir Tahirov, quruluşçu rəssamı isə Nikita Sazonovdur. Tamaşada əsas rolları xalq artistləri Məbud Məhərrəmov, Səfa Mirzəhəsənov, əməkdar artistlər Natalya Şarovskaya, Fuad Osmanov, Mələk Abbaszadə və başqaları ifa ediblər.
APA