Akademik Milli Dram Teatrı Mədəniyyət Nazirliyi və Azərbaycan Teatr Xadimləri İttifaqının təşkilatçılığı ilə ölkəmizi Qazaxıstanda keçirilən beynəlxalq teatr festivalında təmsil edib.
Teatrın mətbuat xidmətindən bildirilib ki, sentyabrın 12-dən 16-dək Aktau şəhərində təşkil olunan Xəzəryanı Ölkələrin II Beynəlxalq Teatr Festivalına Akademik Milli Dram Teatrı “İuda” tamaşası ilə qatılıb.
Beynəlxalq festivala Azərbaycanla yanaşı İran, Türkmənistan, Başqırdıstan, Tatarıstan və Qazaxıstan teatrları qatılıb. Festival Qazaxıstanın məşhur teatr və kino aktyoru Nurmuxan Janturinin 90 illik yubileyinə həsr olunub.
Akademik Milli Dram Teatrının “İuda” monotamaşası festival rəhbərliyi, o cümlədən qeyd olunan ölkələrin teatr ictimaiyyəti tərəfindən yüksək qarşılanıb.
Rejissor Anar Babalının quruluş verdiyi tamaşa Əməkdar artist Ayşad Məmmədovun eyniadlı monopyesi əsasında hazırlanıb. Səhnə əsərində Ayşad Məmmədov özü çıxış edir.
Tamaşanın rəssamı Əməkdar mədəniyyət işçisi İlham Elxanoğlu, işıq üzrə rəssamı Rafael Həsənov, rejissor assistenti Könül Kərimovadır.
Qeyd edək ki, “İuda” tamaşası insan xəyanətkarlığı mövzusuna həsr olunub. İuda ustadı İsa Məsihi satdığına görə vicdan əzabından qurtula bilmir. Səhnə əsəri İudanın daxili aləmini və özünə bəraət qazandırma cəhdini, onu belə addım atmağa sövq edən insani motivləri açıb göstərir.
azertag.az