Prezident İlham Əliyev müqəddəs Qurban bayramı münasibətilə Azərbaycan xalqını təbrik edib.
Təbrikdə deyilir: “Müqəddəs Qurban bayramı münasibətilə sizi və dünyanın
müxtəlif guşələrində yaşayan bütün soydaşlarımızı ürəkdən təbrik edir,
hər birinizə ən səmimi arzu və diləklərimi yetirirəm.
İslamın bir din kimi tamamlanmasını və hidayət yolu olaraq bəşəriyyətə
göndərilməsini özündə ehtiva edən Qurban mərasimləri müsəlmanlara
xeyirxah amallar uğrunda hər cür fədakarlığa hazır olmanın və Uca
Yaradana yaxınlığın fərəhini yaşatmaqla, insanları sülhə, əmin-amanlığa
və qardaşlıq yoluna dəvət edir.
Əziz bacı və qardaşlarım!
Humanizm, xeyirxahlıq və bərabərlik rəmzi olan Qurban bayramı
cəmiyyətimizdə milli mənəvi həmrəyliyi və dözümlülük ovqatını daha da
gücləndirir, insanlar arasında şəfqət və mərhəmət duyğularının
təntənəsini nümayiş etdirir. Bu mübarək gündə bir daha hamınıza Ulu
Tanrıdan möhkəm cansağlığı, ailələrinizə xoşbəxtlik, süfrələrinizə bol
ruzi-bərəkət arzulayıram.
Qurban bayramınız mübarək olsun!”