Azərbaycan Prezidenti yanında Qeyri-Hökumət Təşkilatlarına Dövlət Dəstəyi Şurası Heydər Əliyevin 90 illik yubileyi ilə əlaqədar beynəlxalq yazı müsabiqəsi elan edib.
Şuradan verilən məlumata görə, beynəlxalq yazı müsabiqəsi bir neçə ölkə yazarları arasında keçiriləcək:
“Müsabiqədə Rusiya, Gürcüstan, Ukrayna, Qazaxıstan, Türkiyə, Rumıniyadan ictimai xadimlər, yazıçı, publisist və jurnalistlər iştirak edə bilər.
Müsabiqə təqdim olunan yazılar sözügedən ölkələrin mətbuatında Heydər Əliyev şəxsiyyəti və onun beynəlxalq ictimai-siyasi fəaliyyəti, həmin ölkələrlə Azərbaycanın dostluq və əməkdaşlıq əlaqələrinin yaradılmasındakı rolu haqqında mövzuları əhatə etməlidir.
Yazılar fevralın 15-dən martın 31-dək həmin ölkələrdəki Azərbaycan səfirliklərinə təqdim olunmalıdır.
Hər bir ölkə üzrə ən yaxşı sayılan 1 məqalə mükafatlandırılacaq.
Mükafatın məbləği 3000 avrodur.
Mükafatlandırma mərasimi may ayında Bakıda keçiriləcək”.
Gün.Az