Londonda nüfuzlu "Brit Awards" musiqi mükafatının təqdimetmə mərasimi baş tutub. Bu il mükafatın versiyasına görə, ilin ən yaxşı Britaniyalı müğənnisi Emeli Sande seçilib. Kişilər arasında isə bu nominasiyada Ben Hovard qalib gəlib.
Ən yaxşı britaniyalı qrup nominasiyasında folk-rok janrında ifa edən "Mumford and Sons" qrupu mükafatlandırılıb. Ən yaxşı sinql nominasiyasında isə "Brit Awards" mükafatı Ceyms Bond haqqında növbəti filmin saundtreki olan "Skyfall" mahnısına görə müğənni Adelə çatıb.
Amerika Birləşmiş Ştatlarının "The Black Keys" rok-qrupu isə ən yaxşı xarici qrup seçilib. Ən yaxşı xarici müğənnilər nominasiyasında isə amerikalı müğənni Lana Del Rey və amerikalı reper Frenk Ouşen mükafat alıblar.
Qeyd edək ki, "Brit Awards" mükafatı Böyük Britaniyanın fonoqram istehsalçıları assosiasiyası tərəfindən təsis edilib və 1977-ci ildən bəri təqdim edilir.
ANS PRESS