Aprelin 17-də dünyanın bir çox ölkəsində Hemofiliya Günü qeyd olunur. Bu günün keçirilməsində əsas məqsəd hemofiliya xəstəliyindən əziyyət çəkən insanlara dəstək olmaq, onlara diqqət və qayğı göstərməkdir.
Bununla bağlı Ailə, Qadın və Uşaq Problemləri üzrə Dövlət Komitəsi (AQUPDK) Hemofiliyalı Xəstələrin Respublika Assosiasiyası (HXRA) ilə birlikdə aprelin 16-da “Jumeirah Bilgah” otelində hemofiliyalı uşaqlar və onların ailə üzvlərinin iştirakı ilə tədbir keçirmişdir.
HXRA-nın prezidenti Gülnarə Hüseynova, Respublika Elmi-Praktik Hemofiliya Mərkəzinin rəhbəri Elmira Qədimova və digər çıxış edənlər bu sağalmaz xəstəliyə tutulanların cəmiyyətə inteqrasiyası haqqında danışmışlar.
Qeyd olunmuşdur ki, hazırda hemofiliyadan dünyada təxminən 400 min nəfər əziyyət çəkir. Bu xəstəlik insan qanında laxtalanma faktorlarının çatışmazlığı nəticəsində əmələ gəlir. 1973-cü ildən akademik M.Mirqasımov adına Respublika Klinik Xəstəxanasının nəzdində yaradılmış Elmi-Praktik Hemofiliya Mərkəzində həmin xəstələr müayinə və müalicə olunurlar. “Hemofiliya və talassemiya irsi qan xəstəlikləri üzrə Dövlət Proqramı”na uyğun olaraq faktor preparatları Səhiyyə Nazirliyi tərəfindən mütəmadi olaraq xaricdən ölkəmizə gətirilir. Həmin dərmanlar mərkəzin həkimləri tərəfindən xəstələrə tamamilə pulsuz, dövlət hesabına verilir. Lakin bu xəstələrə daha çox qan lazım olduğu üçün donorlara da ehtiyac vardır.
Tədbirdə hemofiliya xəstəliyi haqqında tamaşa göstərilmiş, ölkəmizdə hemofiliya problemi və bu sahədə aparılan iş haqqında Dünya Hemofiliya Federasiyası tərəfindən çəkilmiş 4 dəqiqəlik film nümayiş olunmuşdur. Həmçinin, AQUPDK-nın uşaqlar üçün təşkil etdiyi “Sabun köpükləri” tamaşası təqdim edilmişdir.
Tədbirin yekunu olaraq uşaqlar dəniz kənarına çıxaraq üzərində “Hemofiliya - imkanlarımızı yaxşılaşdıraq!” yazılmış hava balonunu səmaya uçurtmuşlar.
AzərTAc