Beynəlxalq Qadınlar Klubu Vilnüsdəki Ratuşa binasında ölkədə akkreditə
olunmuş səfirlərlə birlikdə Litvanın sabiq prezidenti Valdas Adamkusun
həyat yoldaşı Alma Adamkenenin dəstəyi ilə Beynəlxalq milad xeyriyyə
bazarı təşkil etmişdir. Satışdan əldə edilən vəsait qocalar və uşaq evlərinə, xəstəxanalara köçürülmüşdür.
GoMap-ın AzərTAc-a istinadən verdiyi məlumata görə, bu xeyriyyə
tədbirində Azərbaycan da təmsil olunmuşdur. Azərbaycanın Litvadakı
səfiri Nairə Şahtaxtinskayanın rəhbərliyi ilə ölkəmizin diplomatik
nümayəndəliyi stend təşkil etmişdir. Litvada təhsil alan azərbaycanlı
tələbələr tədbirə gələnlərə kəlağayılar, əl ilə işlənmiş milli
suvenirlər, Azərbaycan bəstəkarlarının mahnıları yazılmış kompakt
disklər, ölkəmiz haqqında kitablar təklif etmişlər.