Azərbaycanın ilk mobil rabitə operatoru olan «Bakcell» şirkəti «Futbol «Bakcell» ilə» proqramı çərçivəsində yeni layihəyə start verir.
Yeni layihəyə dair bu gün «Bakcell Arena» stadionunda keçirilən mətbuat konfransında çıxış edən şirkətin baş marketinq direktoru Aynur Abjanova qeyd edib ki, Bakının müxtəlif rayonlarında tam təminatlı futbol meydançalarını istifadəyə verən «Bakcell» şirkəti «Manchester United» futbol məktəbinin məşqçilərini Azərbaycana gətirir: «Biz inanırıq ki, bu layihə azərbaycanlı gənclərə istedadlarını ortaya çıxarmaq və gələcəyin futbol ulduzlarına çevrilmək imkanı verəcək. «Manchester United» və AFFA ilə birlikdə həyata keçirilən iki mühüm layihə vasitəsilə «Bakcell» Azərbaycan futbolunun inkişafına böyük diqqət və qayğı göstərir. Bu gün biz böyük məmnuniyyətlə bu iki layihəni bir araya gətirərək Azərbaycanda «Manchester United» Yay Futbol Məktəbi təşkil etmişik. İnanırıq ki, ölkənin müxtəlif regionlarında yaşayan və böyük potensiala malik olan gənclər Azərbaycan futbolunun gələcəyinə öz qiymətli töhfələrini verəcək. Azərbaycanda keçiriləcək «Manchester United» Yay Futbol Məktəbi məşhur brendlər, peşəkar futbol, gözəl məkanlar və gənc insanları bir araya gətirən unikal bir layihədir».
Tədbirdə çıxış edən və bu layihənin ölkə futbolu üçün önəmli hadisə olduğunu deyən AFFA-nın baş katibi Elxan Məmmədov qeyd edib ki, «Manchester United» klubunun futbol məktəbinin məşqçilərinin Azərbaycana dəvət olunması, onların burada seleksiya prosesi aparması ölkə futbolunun inkişafı üçün önəmli hadisədir: «Ümidvaram ki, bu layihə çərçivəsində seçilmiş uşaqlar dünya futbolunun tanınmış simalarına çevrilə biləcəklər».
Qeyd edək ki, AFFA-nın Bakıda və daha 4 şəhərdə (Gəncə, Mingəçevir, Lənkəran və Sumqayıt) «Manchester United» Yay Futbol Məktəbinə seçim turları təşkil olunacaq. Seçimdən müvəffəqiyyətlə keçmiş 8-12 yaş arası 32 gənc istedad iyunun 24-28-də Bakıda «Bakcell Arena» stadionunda təşkil olunacaq və «Manchester United»ın futbol məktəbinin məşqçiləri tərəfindən keçiriləcək təlim-məşq toplantılarında iştirak edə biləcək. Təlim-məşq toplantısının nəticələrinə uyğun seçilən 5 gənc istedad Mançester şəhərinə səfər edib, «Old Trafford» stadionu, «Manchester United» Futbol Akademiyası, eləcə də komandanın təlim-məşq bazasını görə biləcək.
Bakı və regionlar üzrə təşkil olunacaq seçim turlarının yeri və vaxtları:
11-12 iyun, Gəncə ş. AFFA futbol meydançası (Nizami Gəncəvi küç., 26, «Deluxe» hotelinin yanı)
14 iyun, Yaşar Məmmədzadə adına Mingəçevir şəhər Stadionu (İslamzadə küç., 24)
17 iyun, Lənkəran şəhər Olimpiya Kompleksi («Palmolife» hotelinin yanı)
19 iyun, Sumqayıt ş. AFFA futbol meydançası (10-cu mkr., 1-ci binanın qarşısı)
21-22 iyun, Bakı ş. «Bayıl Arena»