Bir zamanlar krallar və kraliçaların gəzdirdikləri nəhəng mirvari dünən satılıb. Mirvari dünya kinosunun əfsanəsi, Hollivudun mərhum ulduzu Elizabet Teylora məxsusdu. GoMap.az portalı Milli.az saytına istinadən bildirir ki, mirvari Nyu-Yorkda 11,84 milyon dollara alınıb.
Əsrlər boyu rəssamların böyük vəchlə əks etdirdikləri, Avropa hökmdarlarının əldə etməyə çalışdıqları "La Peleqrina" mirvarisini Teylora onun əri Riçard Berton 1969-cu ildə almışdı.
"Cartier" boyunbağısındakı mirvariyə "Christie`s" hərrac evinin ekspertləri 3 milyon dollar qiymət qoysalar da, hərracda qiymət dəfələrlə artıb.
"Christie`s" hazırda Teylorun paltar və zinət əşyaları kolleksiyasını satır.
Həyatında 7 dəfə ərə getmiş Elizabet Teylor 2011-ci ilin martında, 79 yaşında dünyasını dəyişib.
Video