Gələn ilin Futbol üzrə Dünya Çempionatı üçün biletlər Fifa-nın saytında satışa verilib.
Açılış oyunu və final biletləri üçün tələbatın yüksək olduğu müşahidə edilib.
İyunun 12-də başlayan yarış üçün üç milyondan çox biletin satılması gözlənilir. Biletləri indidən alanlar, hansı oyunu izləyəcəklərini bilməyəcək - püşkatma dekabrda keçiriləcək.
Bəzi braziliyalı azarkeşlər, o cümlədən yaşı 60-dan çox olanlar və tələbələr üçün biletlərin qiyməti 15 dollardan başlayır. Xaricilər üçün isə ən ucuz bilet 90 dollardır. Rio de Janeirodakı Maracana stadionunda keçiriləcək final üçün biletlərin qiyməti isə 990 dollara qədərdir.
Fifa deyib ki, 2006-cı ildə Almaniyada keçirilən dünya çempionatında olduğu kimi, biletlər üçün yüksək tələbat gözlənilir. O zaman hər yer üçün yeddi iddiaçı var idi.
Bütün tələbatları icra etmək üçün kifayət qədər bilet olmasa, oktyabrın 10-dan əvvəl göndərilən ərizələrdən təsadüfi seçmə üsulu ilə seçiləcək.
ANS PRESS