Bu toy dünyanın ən qəmli, ən pərişan toy mərasimlərindən biri sayıla bilər. İki ildən bəri koma vəziyyətində olan gəlin nikah mərasimindən sonra vəfat edib. Daha doğrusu, həkimlər onun həyatının süni dəstəklənməsi qurğusunu söndürüblər.
Çinin Quançjou şəhərində yaşayan He Szinszin 3 il əvvəl Lu Layla tanış olmuş və ona vurulmuşdu. Gənclər az sonra nişanlanmışdılar. Onlar ailə qurmaq istəyirdilər.
Lakin 2011-ci ildə He Szinszin koma vəziyyətinə düşdü, xəstəxananın intensiv terapiya bölməsinə yerləşdirildi.
... Li Szinszin və Lu Lay Çinin cənub-şərqindəki Quançjou vilayətindəki yerli dövlət qurumlarında çalışırdılar. Onlar toydan sonra ev almağı, bəxtəvər yaşamağı düşünürdülər.
Dünən He Szinszinin 28 yaşı tamam oldu.
Və dünən onun toyu idi.
Henin koma vəziyyətində yatdığı palatada tort vardı. Palata bəzədilmişdi və Henin anası Li Sin He ağlayaraq qızının nikahında iştirak edirdi.
Lu Lay nişanlısının əlindən tutdu və titrəyən səslə dedi: "Bax, artıq evlənirik! Toyumuzdur, He! Sən artıq xanımımsan..."
Gəlinlik paltarında olan, amma gözləri açılmayan və güclə nəfəs alan He isə bunları eşitmirdi.
Dövlət məmuru "Sizi ər və arvad elan edirəm!" deyəndə Lu Lay göz yaşlarını saxlaya bilmədi.
İki saat sonra isə həkimlər He Szinszini süni yaşam qurğusundan ayırdılar.
Henin ailəsinin qərarına görə, koma vəziyyətindən ayılmayaraq gəlin olan və ərə gedən He Szinszinin orqanları başqa xəstələrə yardım məqsədilə istifadə olunacaq.
"O öldü. Nikahımızdan iki saat sonra o vəfat etdi. He həmişə ürəyimdə olacaq. Ömrümün sonunadək onun qüssəsini çəkəcəyəm", - Lu Lay deyib.
Lu Layın dediyinə görə, He əvvəllər özünü bir qədər nasaz hiss edirmiş: "Ona dedim ki, işə getməsin, evdə otursun. Qulaq asmadı, işləmək istədiyini dedi. Sonra mənə zəng vurub söylədilər ki, He işdə huşunu itirib, kompüterin üstünə yıxılıb. Onu xəstəxanaya apardıq və həmin gündən bəri ayılmadı".
He Szinszinin atası Lu Fanın sözlərinə görə, həkimlər koma vəziyyətində olan qızının beyin funksiyalarının pozulduğunu söyləyiblər.
"He ailəmizin yeganə övladı idi. Onun arzusunu çin etdik, nikahını, toyunu etdik. Nikahdan iki saat sonra He öldü. Heç nə demək istəmirəm", - Lu Fan söyləyib.
Milli.Az