Gənclərə öz biznes ideyalarını reallaşdırmağa imkan verən Azərbaycanda ilk işgüzar tele-müsabiqə başlayır.
Layihə Azərbaycan-Türkiyə Gənclərinin Dostluq Cəmiyyəti, Azərbaycan Respublikası Gənclər və İdman Nazirliyi, Azərbaycan Respublikası Prezidenti yanında Gənclər Fondun və Youth İNC proqramının təşkilati dəstəyi ilə həyata keçirilir.
“İDEYA QAZANDI" televiziya yarışmasında 5 investor gənclərin ideyalarına sərmayə yatırmaq üçün seçim edir və bu ideyalarını həyata keçirtməyə vəsait ayırır. İnvestorlar Paşa Bank, Garant Holdinq kimi nüfuzlu şirkətlər və təcrübəli sahibkarlardır.
Məqsədimiz istedadlı gənclərə, tələbələrə, xırda sahibkarlığa baş vurmuş gənclərə öz ideya və ya bizneslərini reallaşdırmaq üçün şərait yaratmaq, eyni zamanda investorlara istedadlı gəncləri tanıtdırmaq və yerli televiziyada biznes üslubunda verliş yayımlamaqla tamaşaçılar arasında potensial gəncləri biznesin qaydaları ilə tanış etməkdir.
Verilişdə 16-35 yaş arası gənclər iştirak edə bilər. İştirak etmək istəyən gənclər yalnız elektron vasitəsi ilə ideyaqazandi.az və atgdc.org saytlarından ərizə formasını doldurub iştiraklarını təsdiq edə bilərlər. Ərizələrin son qəbul tarixi 30 noyabrdır.
Ərizə forması tam və düzgün doldurulduğu halda gənc verilişə dəvət olunur və investorlara ideyasını təqdim edib qarşılıqsız yatırım alması imkanını qazanır.
Qalib gələn gənclər pul vəsaitindən savayı onlara dəstək göstərmiş şirkət və ya sahibkar ilə mütəmadi olaraq əlaqə qurub onların geniş təcrübələrindən bəhrələnmək imkanını əldə edəcək. Verilişin televiziyada yayımı 15 yanvar tarixindən sonra keçiriləcək.
Məlumat üçün bildirmək istəyirik ki, Azərbaycan-Türkiyə Gənclərinin Dostluq Cəmiyyəti 1999-cu ildən fəaliyyət göstərərək Azərbaycan və Türkiyə gəncləri arasında mütəmadi olaraq mədəni, sosial və ictimai əlaqələrinin inkişafı naminə layihələr həyata keçirdir.
Publika.Az