Noyabrın 22-də Heydər Əliyev Mərkəzində ABŞ-ın Kosmik və Raket Mərkəzinin “Kosmosa səyahət” sərgisinin dünya premyerasının açılışı olacaq.
Kosmosla yarım əsrlik tanışlıq müddətindəki yenilikləri əks etdirən sərgidə 100-dək eksponat nümayiş olunacaq. Bunların sırasında kosmik stansiyalar, kosmosa gedib-gəlmiş və digər planetlərdən gətirilmiş orijinal nümunələr, müxtəlif peyklərin hissələri və onların maketləri, kosmonavt geyimləri və aksessuarları, meteoritlər və s. var.
Sərgidə 6 fərqli simulyator vasitəsi ilə izləyicilər özlərini qısa müddətdə də olsa, “fəza”da kosmonavt kimi hiss edə biləcək.
İlk dəfə nümayiş olunan eksponatlarla yanaşı, sərgidə Azərbaycanın aerokosmik nailiyyətlərini əks etdirən xüsusi təqdimat da olacaq. Ziyarətçilər Azərbaycanın ilk süni peykinə dair məlumatlar, maketlər barədə məlumat əldə edə biləcəklər.
Sərgi bir çox eksponatların ilk dəfə nümayiş olunması ilə yadda qalacaq. 2014-cü ilin fevralın 23-dək davam edəcək sərgi Bakıdan sonra Paris, Brüssel, Amsterdam, Milan və digər şəhərlərdə də keçiriləcək.
Qeyd edək ki, “Kosmosa səyahət” sərgisi Heydər Əliyev Mərkəzinin elm və təhsil sahəsindəki layihələri çərçivəsində Azərbaycan Respublikası Rabitə və İnformasiya Texnologiyaları Nazirliyi ilə birgə təşkil olunub.
APA