Bir qayda olaraq film həvəskarlarını müxtəlif yeniliklərlə sevindirən Azərbaycanın premium səviyyəli “28 Cinema” kinoteatrı növbəti yeniliyi təqdim edir.
“28 Cinema”dan bildirmişlər ki, kinoteatr çoxlarının böyük səbirsizliklə gözlədikləri “Hobbit: Smauqun viranlığı” ekran əsərini Azərbaycanda ilk dəfə yeni film formatında təqdim edəcəkdir. Film həvəskarları artıq dekabrın 19-dan etibarən məşhur hobbit haqqında növbəti filmi tam yeni – yüksək tezlikli 3D (HFR 3D) video formatında izləyə biləcəklər.
HFR 3D video formatında filmlərə yalnız xüsusi kinoteatrlarda baxmaq mümkündür. HFR 3D özündə hərəkət edən görüntülər təcrübəsində texniki inkişafı əks etdirir. Bu innovativ format görüntünü saniyədə insanın görmə qabiliyyətinə yaxın olan 48 kadrla təqdim edir. Bu isə hazırda bütün dünyada olan kinoteatrlardakı standart görüntü tezliyindən iki dəfə çoxdur.
AzərTAc