Azərbaycan paytaxtında küləkli hava şəraiti növbəti günlər davam edəcək. Ekologiya və Təbii Sərvətlər Nazirliyinin Milli Hidrometeorologiya Departamentinin Hidrometeoroloji Proqnozlar Bürosunun baş hidroloqu Asif Verdiyevin verdiyi məlumata görə, 20-21 iyunda Bakıda və Abşeron yarımadasında küləkli hava şəraiti müşahidə olunacaq. Havanın dəyişkən buludlu olacağı, arabir tutulacağı gözlənilir. İyunun 20-də səhər və axşam saatlarında yarımadanın bəzi yerlərində qısa müddətli yağış yağacaq. Havanın temperaturu Bakıda və Abşeron yarımadasında gecə 17-22, gündüz 24-29 dərəcə isti təşkil edəcək.
Azərbaycanın rayonlarında isə yağış yağacağı ehtimal olunur. Dağlıq və dağətəyi ərazilərdə leysan yağacaq. Bölgələrdə də iyunun 20-21-də külək əsəcək. Ayın 21-də gündüz saatlarından etibarən küləyin kəsiləcəyi ehtimal olunur. Havanın temperaturu Aran rayonlarında gecə 18-23, gündüz 28-33 dərəcə, dağlarda gecə 8-13, gündüz 18-23 dərəcə isti təşkil edəcək. İyunun 21-də isə gecə 17-22, gündüz 25-30, dağlarda gecə 7-12, gündüz 14-19 dərəcə isti olacaq.
APA