Bəzən
insanların maraqlı bir hobbisi olur. Məsələn, kimisi oyma sənətindən,
kimisi isə adi şüşələrdən müxtəif əşyalar hazırlayır. Lənkəran rayonunun Cil kənd sakini, 41 yaşlı Əli Əkbərovun isə qeyri-adi bir hobbisi var. O, qramafon vallar toplamaqla məşğuldur.
Hələ
uşaqlıqdan musiqiyə, xüsusilə də muğam ifaçılığı sənətinə maraq
göstərən Əli uzun illərdir ki qrammofon vallarını toplamaqla məşğuldur.
Əli orta məktəbi bitirdikdən sonra Bakıda Mədəni-Maarif Texnikumuna
daxil olub. Qrammofon vallarını toplamağa da məhz elə həmin dövrdən
başlayıb. Hazırda kənd klubunda çalışan və eyni zamanda yerli məktəbdə
musiqi fənnini tədris edən Əli Əkbərovun evindəki şəxsi arxivində
Azərbaycanın 100-dən çox görkəmli muğam ifaçısının və müğənnisinin
səsləri yazılmış 1000-ə yaxın qrammofon valı toplanıb. Əlinin sözlərinə
görə, tələbəlik illərində sevdiyi sənətkarların evlərini qapı-qapı
gəzməklə bu zəngin musiqi xəzinəsini əldə etməyə nail olub.
Görkəmli
xanəndələrdən Cabbar Qaryağdıoğlunun, Məşədi Məhəmməd Fərzəliyevin,
Keçəçi oğlu Məhəmmədin və digərlərinin 1904, 1905, 1912-ci illərdə
Varşava, Riqa, Vilnüs kimi şəhərlədə yazılmış valları bu gün Əli
Əkbərovun şəxsi arxivində göz bəbəyi kimi mühafizə olunur. Əlinin
sözlərinə görə, onda elə nadir vallar var ki, respublikanın hər hansı
bir arxivində tapmaq qeyri-mümkündür.
Əli yenicə tikib
köçdüyü evinin bir otağını vallara, kitablara ayırıb. Son illər
Azərbaycanda muğam sənətinin inkişafı üçün həyata keçirilən layihələri
yüksək qiymətləndirən Əli Əkbərov gənc xanəndələrimizin öz sələflərindən
hələ çox mətləbləri öyrənməli olduqlarını da dilə gətirdi.
Milli.Az