Rusiya Federasiya Şurasının sədrinə Bakı Dövlət Universitetinin fəxri
doktoru adı verilib. Valentina Matviyenkoya ikitərəfli əlaqələrin
inkişafında, elm və təhsil sahəsində əlaqələrin genişləndirilməsində
aktiv iştirakına görə layiq görüldüyü fəxri doktor diplomunu
universitetin rektoru Abel Məhərrəmov təqdim edib.
Mərasimdə çıxış edən BDU rektoru universitetin Rusiya ali məktəbləri ilə
əlaqələrindən danışıb. Onun sözlərinə görə, hazırda universitetdə 17
fakültə, 124 kafedra, 24 elmi laboratoriya fəaliyyət göstərir. BQU-da
təhsil alan 20 min tələbədən 1500 nəfərə yaxını dünyanın 16 ölkəsindən
gəlmiş əcnəbilərdir.
Valentina Matviyenko isə çıxışında qeyd edib ki, Azərbaycanla Rusiyan
bir-birinə çox şey bağlayır: “Aprelin 4-də ölkələrimiz diplomatik
münasibətlərin qurulmasının 20 illiyini qeyd ediblər və bu 20 il ərzində
münasibətlərimiz pozitiv xətt üzrə inkişaf edib. Ötən il ölkələrimiz
arasında ticarət dövriyyəsinin həcmi 2,8 milyard dollar təşkil edib.
Hazırda Azərbaycanla Rusiya 2015-ci ilədək dövrü əhatə edəcək mədəniyyət
sahəsində əməkdaşlığa dair dövlətlərarası proqramı imzalamağa
hazırlaşırlar”.
Federasiya Şurasının sədri ölkədə rus dilinə ayrılan diqqətə görə
Azərbaycana təşəkkürünü bildirib. Onun sözlərinə görə, hazırda Rusiyada 6
min azərbaycanlı tələbə təhsil alır, onlardan 1500 nəfəri dövlət
hesabına təhsil alan tələbələrdir.
Dağlıq Qarabağ münaqişəsinin nizamlanması məsələsinə toxunan Valentina
Matviyenko bildirib ki, Rusiya bu istiqamətdə aktiv səylərini davam
etdirir: “Nizamlanma prosesi gedir, lakin hələlik gözlənilən nəticələr
əldə olunmayıb. Təəssüf ki, bu münaqişənin sürətli həll yolu yoxdur”.
Onun sözlərinə görə, Dağlıq Qarabağ münaqişəsinin nizamlanması
beynəlxalq hüquq normaları çərçivəsində həyata keçirilməsi, tərəflər
arasında etimad mühiti formalaşdırılmalı, ziyalılar, gənclər arasında
əlaqələr qurmaq lazımdır.
APA