“İçərişəhər” Dövlət Tarix-Memarlıq Qoruğu İdarəsinin Elmi-Mədəni Mərkəzi tərəfindən “İçərişəhər tarixdə - tarix İçərişəhərdə” mövzusunda elmi-praktik konfrans keçirilib.
İdarədən bildirilib ki, tədbirdə ictimai xadimlər, ekspertlər, tarixçi alimlər, idarə əməkdaşları iştirak ediblər.
Tədbiri giriş sözü ilə “İçərişəhər” Dövlət Tarix-Memarlıq Qoruğu İdarəsinin rəisi Əsgər Ələkbərov açaraq İçərişəhərin unikal memarlıq-şəhərsalma kompleksi kimi mövqeyinin möhkəmlənməsi, mühafizəsi, bərpası, tarix-memarlıq abidələrinin elmi, tarixi və mədəni cəhətdən öyrənilməsi, dünyada tanıdılması və beynəlxalq səviyyədə təbliğ edilməsi sahəsində görülmüş işlərdən danışıb. Yüksək peşəkarlıqla və gözəl memarlıq üslubunda həyata keçirilmiş təmir-bərpa, abadlıq, konservasiya və restavrasiya layihələrindən bəhs edən idarə rəisi bu günlərdə aparılmış uzunmüddətli işlərdən sonra açılışı olan Marionet Teatrı və Bəylər məscidində yeni yaradılmış muzey ekspozisiyalarını xüsusi vurğulayıb.
Elmi-praktik konfransda Azərbaycan dövlətçiliyinin rəmzi, Şirvan dövlətinin tarixi iqamətgahı olmuş Şirvanşahlar Saray Kompleksi, eləcə də Qız qalası, Dördbucaqlı qala, müqəddəs Nikolay kilsəsi, Bakı xanlarının evi kimi memarlıq və tarixi xüsusiyyətləri, İçərişəhərin timsalında Orta əsr Şirvan-Abşeron memarlığının təkamülü və Azərbaycan tarixinin təbliğində burada yerləşən abidələrin əhəmiyyəti, müxtəlif dövrlərdə İçərişəhərdə aparılmış arxeoloji qazıntılar, İçərişəhərin tarixinə aid tədqiqatların Rusiya və Avropa kitabxanalarındakı bəzi mənbələr, Yun kitabələri, o cümlədən yeni arxiv materialları əsasında araşdırılması, İçərişəhərin məişət həyatı, məşhur və tarixi ailələr - Səlimxanovlar, Dadaşovlar və onlara məxsus mülklər və s. mövzularda məruzələr səsləndirilib.
Cəfər Qiyasi, Kamil İbrahimov, Solmaz Rüstəmova-Tohidi, İdris Əliyev və digər alimlərin mövzuya dair çıxışları ətrafında müzakirələr aparılıb.
Tədbirin sonunda iştirakçılara elmi-praktik konfransın ayrıca kitab şəklində nəşr edilmiş tezislər və məqalələr topluları təqdim olunub.
azertag.az