Dövlət İmtahan Mərkəzi (DİM) tərəfindən xüsusi qabiliyyət tələb edən ixtisaslara qəbul olmaq istəyənlər üçün "Abituriyent" jurnalının xüsusi buraxılışı olan vəsaitlər çapdan çıxıb.
DİM-dən bildirilib ki, vəsaitlər xüsusi qabiliyyət tələb edən ixtisasları seçənlərin imtahana səmərəli hazırlaşmaları üçün nəzərdə tutulub. Vəsaitlərdə qabiliyyət imtahanı proqramları, qiymətləndirmə meyarları, imtahanlara hazırlıqla bağlı tövsiyələr, tapşırıq nümunələri, reproduksiyalar, normativlər, ixtisasların yığcam xarakteristikası, onların hansı ali təhsil müəssisələrində olması haqqında məlumatlar yer alıb.
Xüsusi qabiliyyət tələb edən ixtisaslara dair materiallar “Təsviri sənət”, “Musiqi sənəti”, “Memarlıq və dizayn”, “Teatr, kino və xoreoqrafiya sənətləri” və “Bədən tərbiyəsi və idman” kitabçalarında təqdim edilib.
Vəsaitlərdə, həmçinin ümumi (9 illik) və tam (11 illik) orta təhsil bazasında orta ixtisas təhsili müəssisələrinin xüsusi qabiliyyət tələb edən ixtisasları üzrə proqramlar, qiymətləndirmə meyarları və tövsiyələr də verilib.
Vəsaitlərin elektron versiyasını (pdf formatında) DİM-in internet saytının "Elektron xidmətlər" bölməsində "DİM nəşrlərinin elektron versiyalarının onlayn satışı" xidməti və ya abiturient.az saytının "DİM nəşrlərinin PDF formatda satışı" bölməsi vasitəsilə ödəniş etməklə əldə etmək olar.
azertag.az