Türkiyə Azərbaycanla birlikdə ölkələrarası turizm turları təşkil etməyi nəzərdə tutur.
Bunu Türkiyənin Azərbaycandakı səfirliyinin mədəniyyət və təbliğat müşaviri İrfan Çiftçi deyib.
Müşavirin sözlərinə görə, birgə turlar Azərbaycan və Türkiyəyə qonşu və yaxın olan ölkələrə təşkil edilə bilər. Azərbaycan və Türkiyənin birgə turizm turuna Gürcüstan, Özbəkistan, Qazaxıstan, Rusiya əlavə edilə bilər: “Azərbaycanı mümkün olduğu qədər Türkiyədəki turizmə inteqrasiya etmək fikrimiz var. Məsələn, bu gün Orta Avropa, Avropa, Akdeniz və s. birgə turları var. Niyə Türkiyə-Azərbaycan-Gürcüstan, yaxud Türkiyə-Azərbaycanın digər ölkələrlə birlikdə turları olmasın? “
İ.Çiftçi əlavə edib ki, bütün bunlar qarşıda duran potensial istiqamətlərdir. Müşavir əlavə edib ki, hazırda birgə turların yaradılması üçün ölkələrin şirkətləri arasında danışıqlar aparılır. Onun sözlərinə görə, bu mövzü üzrə qapalı görüşlər keçirilir: “Hesab edirəm ki, belə məsələlər şirkətlər arasında aparılan danışıqlarla həll edilməlidir. Biz isə sadəcə olaraq, onlar üçün imkanlar yaradırıq”.
İ.Çiftçi bildirib ki, bu il iyun ayında Bakı-Tbilisi-Qars dəmiryolu açılacaq: “Bununla bərabər, turizm sahəsində də yeni bir sahə açılır. Hesab edirəm ki, şirkətlər bunu dəyərləndirəcək. Qatar turizmi çox gözəl turizm növüdür. Məncə, şirkətlər bu sahədə işə başlaya bilərlər”.
trend