Azərbaycan Dillər Universitetində (ADU) ümummilli lider Heydər Əliyevin anadan olmasının 94-cü ildönümü ilə əlaqədar keçirilən bədii yaradıcılıq festivalının aprelin 12-də seçim mərhələsi təşkil edilib.
ADU-dan bildiriblər ki, festival Təhsil Nazirliyinin və Azərbaycan Təhsil İşçiləri Azad Həmkarlar İttifaqı Respublika Komitəsinin rəyasət heyətinin birgə qərarına əsasən keçirilir. Məqsəd Ulu Öndərin xatirəsinə ehtiram əlaməti olaraq ADU-nun tələbələrini mədəniyyətimizə və milli adət-ənənələrimizə hörmət ruhunda tərbiyələndirmək, onların incəsənət sahəsindəki istedadlarını üzə çıxarmaq və inkişaf etdirməkdir.
Azərbaycan Dövlət Mədəniyyət və İncəsənət Universitetinin rektoru, münsiflər heyətinin sədri Fərəh Əliyeva, İncəsənət Gimnaziyasının xoreoqrafiya şöbəsinin müdiri, Xalq Artisti Təranə Muradova, Azərbaycan Dövlət Pedaqoji Universitetinin müəllimi, Əməkdar İncəsənət Xadimi Nailə Mirməmmədli, Azərbaycan Milli Konservatoriyasının baş müəllimi Samir Cəfərov, beynəlxalq müsabiqələr laureatı, tarzən Arslan Növrəsli, Azərbaycan Dövlət Akademik Opera və Balet Teatrının baş rejissoru, Əməkdar İncəsənət Xadimi Hafiz Quliyev festivalın seçim mərhələsi iştirakçılarının çıxışlarını izləyiblər.
Tədbirdə ADU-nun tələbələri şeirlər söyləyib, rəqslər nümayiş etdirib və mahnılar səsləndiriblər.
azertag.az