Heydər Əliyev Fondunun vitse-prezidenti, Rusiya Azərbaycanlı Gənclər Birliyinin (RAGB) sədri Leyla Əliyevanın təşəbbüsü ilə aprelin 25-də M.V.Lomonosov adına Moskva Dövlət Universitetinin (MDU) Botanika bağında Azərbaycan ilə Rusiya arasında diplomatik əlaqələrin qurulmasının 25-ci ildönümü münasibətilə ağacəkmə aksiyası keçirilib. Aksiyada RAGB-nin fəalları iştirak ediblər.
MDU-nun Botanika bağında 2013-cü ildə yaradılmış dərman bitkiləri bölməsinə Heydər Əliyev Fondunun vitse-prezidenti Leyla Əliyevanın adından zeytunkimilər fəsiləsindən olan Birgöz, Yapongülü və s. dərman kolları hədiyyə edilib. Azərbaycanda geniş yayılmış bu bitkilərdən xalq təbabətində istifadə olunur.
Botanika bağının direktoru Aleksey Reteyum bildirib ki, dərman bitkiləri bölməsi Botanika bağında yeni yaradılıb. Burada dünyanın bir çox ölkələrindən gətirilmiş dərman kolları və bitkiləri əkilir, yeni landşaft kompozisiyası yaradılır. A.Reteyum deyib: “Heydər Əliyev Fondunun vitse-prezidenti Leyla Əliyevanın rəhbərlik etdiyi RAGB ilə əməkdaşlığımız sayəsində Azərbaycan təbiətinə aid bitkilərdən ibarət yeni landşaft yarada, kolleksiyamızı daha da zənginləşdirə bilirik. Bu, bizi çox sevindirir. Leyla Əliyevanın adından hədiyyə olunan bitkilər bağımızın mərkəzində əkilib. Botanika bağına gələn hər kəs Azərbaycan ilə Rusiya arasında diplomatik əlaqələrin qurulmasının 25 illiyi münasibətilə hədiyyə olunan bitkilərin əkildiyi sahəni seyr edə biləcək. Burada Azərbaycan, həmçinin Rusiya Azərbaycanlı Gənclər Birliyi və bu gün keçirilən aksiya barədə məlumat verən lövhə də yerləşdirmişik. MDU-nun Botanika bağının çoxəsrlik tarixi var və bu gün əkilən bitkilər də uzun illər bu bağa yaraşıq verəcək, azərbaycanlı dostlarımızdan xatirə qalacaq. Biz gələcəkdə Botanika bağında Azərbaycan ilə birgə tədbirlər keçirməyi də nəzərdə tutmuşuq”.
MDU-nun Botanika bağının Rusiya hökumətinin dəstəyi ilə yaradılan dərman bitkiləri bölməsində 150-dən çox bitki toplanıb. Onların arasında xalq təbabətində geniş istifadə olunan bitkilərlə yanaşı, nadir bitki və kol növlərinə də rast gəlinir.
azertag.az