Qazaxıstanın paytaxtı Astanada III Avrasiya Beynəlxalq Kitab sərgisi (Eurasian Book Fair -2018) çərçivəsində qazax dilinə tərcümə olunmuş “Yeni zaman Azərbaycan şeiri antologiyası” kitabının təqdimatı keçirilib.
Təqdimatda Azərbaycanın Qazaxıstandakı səfiri Rəşad Məmmədov nəşrin əhəmiyyətindən danışıb. Bildirilib ki, əsrlərlə kağızlara köçürülən fikirlər, düşüncələr qiymətli yaradıcılıq nümunələridir. Bu yaradıcılıq nümunələrinin gələcək nəsillərə çatdırılması olduqca xeyirxah işdir.
İlk dəfə Qazaxıstan Prezidenti Nursultan Nazarbayevin həyat yolundan bəhs edən kitabın Azərbaycan dilinə tərcümə etdirildiyini vurğulayan diplomat təqdimatını hər iki qardaş ölkədə keçirildiyini söyləyib. May ayında ümummilli lider Heydər Əliyevdən bəhs edən və klassik Azərbaycan şair və yazıçılarının antologiyasının da qazax dilinə tərcümə olunmuş nüsxələrinin təqdimatı keçiriləcək. Əminik ki, bu kitablar xalqlarımızı daha da yaxınlaşdıracaq.
Kitabın ərsəyə gəlməsində xidmətləri olan Gənc Yazıçılar Birliyi məsləhət Şurasının rəhbəri Əkbər Qoşalı təşkilatın yaradılması və fəaliyyətindən bəhs edərək bildirdi ki, bu qurum əsası 20 il bundan öncə Qazaxıstanın Türküstan şəhərində Əhməd Yasəvi adına Universitetində qoyulub. Bu il Qazaxıstanda yaradılmasının 20 illiyini qeyd edən təşkilat, gələn il də Azərbaycanda beynəlxalq təşkilat olaraq qeydiyyatdan keçmələrinin 20 illiyini qeyd edəcək.
O, təşkilatın ötən dövr ərzində gördüyü işlərdən və reallaşdırdığı layihələrdən danışıb.
Azərbaycanda artıq 57 qazax şairlərinin antologiyasının Azərbaycan dilində çapdan çıxdığını və təqdimatının keçirildiyini bildirib: “Bu baxımdan da bu dəfə Azərbaycanın 41 gənc və orta yaşlı təmsil edən şairlərinin şeirlərini qazax dilində çap etməyə qərar verdik. Bu kitaba yer alan şeirlərdə Azərbaycanın ruhunu, perspektivini, bu gününü və həm də keçdiyi tarixi görmək mümkündür”.
Gələcək planlardan söz açan Əkbər Qoşalı deyib ki, may ayında Türkiyədə təşkil olunacaq şeir festivallarına Azərbaycan da qatılacaq. Bundan başqa Tatarıstanın gənc yazarlarının antologiyasını çap etdirən təşkilat hazırda Saxa-Yakutiya Respublikasının klassiki Platon Ayunskinin 150 illik yubiley kitabı üzərində işləyir.
Azərbaycan Yazıçılar Birliyinin üzvü İlqar Türkoğlu türkdilli ölkələrin şair və yazıçıları arasında bu cür təqdimatların və birgə layihələr həyata keçirməsini yüksək qiymətləndirib və deyib ki, bu, münasibətlərin möhkəmlənməsində böyük rol oynayır.
Tədbirdə kitabdan qazax dilində şeirlər səsləndirilib.
Azərbaycanın xalq mahnısı “Sarı gəlin”in qazax dilində ifa olunması isə təqdimat iştirakçılarında xoş əhval yaradıb.
Xatırladaq ki, üç gün davam edəcək III Avrasiya Beynəlxalq Kitab sərgisində (Eurasian Book Fair -2018) Azərbaycan, Rusiya, Polşa, Böyük Britaniya, Belarus, Tacikistan, Türkiyə, Çin, Hindistan, Albaniya və digər dövlətlərdən 18 təşkilat, 155 şirkətin nümayəndəsi iştirak edir.
azertag.az