Bakıda 11-13 sentyabr tarixlərində “Şərq Nağılı” Əlilliyi olan Gənclərin I Beynəlxalq Yaradıcılıq Festivalı keçiriləcək.
Gənclər və İdman Nazirliyinin mətbuat xidmətindən verilən xəbərə görə, festival ümummilli lider Heydər Əliyevin 90 illik yubileyinə həsr olunur.
Festival Gənclər və İdman Nazirliyinin təşəbbüsü və dəstəyi, “Dan” Beynəlmiləlçi Gənclər, “Müşviq” Əlil Uşaqlara Yardım və “Müstəqil Həyat” Dəstək və İnkişaf Mərkəzi İctimai Birliklərinin təşkilati dəstəyi ilə keçiriləcək.
Əsas məqsəd isə əlilliyi olan istedadlı gənclərin yaradıcılıq bacarıqlarının reallaşdırılmasının dəstəklənməsi, ictimaiyyətin diqqətinin humanizm ideyaları, mədəni dəyərləri və əlilliyi olan gənclərin yaradıcılığına cəlb edilməsi, əlilliyi olan gənclərin sosial inteqrasiyası və adaptasiyasının təşviqi, əlilliyi olan gənclərlə ünsiyyətin qurulması və təcrübə mübadiləsi üçün şəraitin yaradılmasıdır.
“Şərq Nağılı” Əlilliyi olan Gənclərin I Beynəlxalq Yaradıcılıq Festivalında 11 ölkədən 200-dən çox gəncin iştirakı nəzərdə tutulur. İştirakçı dövlətlər müsabiqəyə mahnı, rəqs, teatr və instrumental musiqidən ibarət proqram təqdim ediblər. Festival çərçivəsində əlilliyi olan gənclərlə işləyən yerli təşkilatlar və fərdi təlimçilər üçün xarici ekspertlərinin ustad dərsləri (master-klass) təşkil ediləcək.
Qeyd edək ki, festival ərəfəsində Gənclər və İdman Nazirliyi və UNİCEF tərəfindən 20 nəfər qaçqın, məcburi köçkün və əlilliyi olan gənclər üçün xarici ekspert tərəfindən fotoqrafiya üzrə 5 günlük təlimlərə başlanıb. Təlimlər nəticəsində iştirakçılar tərəfindən çəkilmiş və ekspert tərəfindən seçilmiş fotoşəkillər festivalın bağlanış mərasimi və Qala-konsertin keçirildiyi Heydər Əliyev adına Sarayda təşkil olunmuş sərgidə nümayiş etdiriləcək.
Festival iştirakçıları üçün zəngin elmi-mədəni proqram hazırlanıb: Fəxri və Şəhidlər xiyabanlarının ziyarəti, Milli Məclisdə konfrans, Qala və Atəşgah arxeoloji-etnoqrafiya muzeylərinə səfər, Qara Qarayevin “Yeddi gözəl” baleti, şəhər və dəniz gəzintisi.
“Şərq Nağılı” Əlilliyi olan Gənclərin I Beynəlxalq Yaradıcılıq Festivalının açılış və bağlanış mərasimində festival qalibləri və estrada ulduzlarının iştirakı ilə möhtəşəm konsert proqramı və iştirakçıların diplom və qiymətli hədiyyələrlə təltif edilməsi nəzərdə tutulub .
Gün.Az